Монгол улсын гавъяат дасгалжуулагч, Спортын мастер Ё.Төмөрбатаагийн нэрэмжит "Боксын олон улсын тэмцээн” Дорнод аймагт хоёр дахь удаагаа зохиогдохоор болжээ. Энэхүү тэмцээнд Монгол улс, ОХУ, БНХАУ-аас гадна Япон, БНАСАУ-аас баг тамирчдыг урьж оролцуулахаар төлөвлөсөн  ч хөрөнгө санхүүгийн хувьд багагүй бэрхшээл тулгараад байгаа аж. Бид тэмцээний бэлтгэл ажлын талаар ССАЖГ-ын боксын дасгалжуулагч Т.Эрдэнэбаяраас тодруулсан юм.

Олон улсын Боксын тэмцээн хэзээ болох вэ? Бэлтгэл ажлын талаар товч мэдээлэл өгнө үү

Тэмцээн 2014 оны 06–р сарын 02-08-ны өдрүүдэд Дорнод аймгийн Соёл, спорт, аялал жуулчлалын газрын зааланд болно. Тэмцээнд АИБА-гийн дүрэм ёсоор – Насанд хүрэгч: эрэгтэй 49 кг, 56 кг, 60 кг, 64 кг, 69 кг, 75 кг, эмэгтэй 51 кг, 60 кг, – Залуучууд: Эрэгтэй 1996-1997 он 60 кг, Эмэгтэй 48 кг, 69 кг 1996-1997 онд төрсөн тамирчид оролцох юм. Дорнодоос боксын спортоор амжилт гаргаж буй олон арван залуус бий. Манай Шинэбаяр гэхэд 75кг, Отгондалай 60кг, Идэрхүү 56 кг жинд тус тус тоглоно.

Бид тэмцээнээ олон улсын Б зэрэглэлийн шаардлагад нийцсэн өндөр түвшинд зохион байгуулахаар төлөвлөж байна. Ийм ч учраас хөрш зэргэлдээ 4 улсын багийг урихаар болсон. Уул нь зохион байгуулалтын зардалд нийт 60 сая төгрөг шаардлагатай байгаа юм. Энэ саналаа аймгийн удирдлагуудад уламжилсны дагуу ИТХ хуралдаад Засаг даргын нөөц сангаас 30 сая төгрөг гаргахаар болсон. Гадны олон улсын баг тамирчдыг орон нутагтаа хүлээн авч, ойрын хэдэн жилд зохиогдоогүй томоохон хэмжээний тэмцээн хийнэ гэдэг утгаараа аймаг орон нутгаас дэмжиж байгаад баяртай байна. Гэхдээ төсөв мөнгө хараахан хүрэлцэхгүй байгаа учраас спортод элэгтэй түмэн олноосоо дэмжлэг туслалцаа хүсч байна л даа.

Тухайлбал?

Спортынхон бид гадаадад явахад танай улсад тийм байсан гэх мэт янз бүрийн яриа хөөрөө гарах нь бий. Энэ чинь улс орны нүүр царай яригдах асуудал шүү дээ. Иймээс ядаж байр хоолны зардлыг нүүр улайхааргүй хэмжээнд зохион байгуулмаар байгаа юм. Улс бүрээс 12 зочин урихаар төлөвлөсөн. Нэг хүний хоолны мөнгө 20 мянга орчим. Өдөрт 3-н удаа хоолтой гээд бодохоор энэ мөнгө хаанаа ч хүрэхгүй болоод байдаг.

Төсөв мөнгө хүрэлцэхгүй байгаа учраас аль нэг улсыг нь хасаад ядаж 3 улсын тамирчид урьдаг юм билүү гээд ярилцаж л байна. Тэмцээний зохион байгуулалтын асуудалд Монгол улсын Боксын спортын холбоо тодорхой дэмжлэг үзүүлж оролцож байгаа. Тухайлбал нарийн бичиг П.Сэрдамба БНАСАУ, Н.Банди багш Японы тамирчидтай холбоо бариад байна. Мөн медалиудаа захиалаад урилга, тасалбар гэх мэт зүйлсээ хэвлээд эхэлчихсэн байгаа. 2012 онд зохиогдсон Ё.Төмөрбатаагийн нэрэмжит тэмцээн тун амжилттай болж өнгөрсөн. Бид энэ удаагийн тэмцээнээ илүү өндөр түвшинд зохион байгуулах санаатай.

Дорнодын боксчид маань тэмцээндээ хэрхэн бэлтгэж байна? Та бүхэн өөрсдийн гэсэн боксын заалтай болж байгаа гэж сонссон?

Тиймээ. Аймгийн ССАЖГ-ын доор хуучин гарааш байсан өрөөг бид янзалж тохижуулаад боксын танхим болгох гэж байгаа юм. Сэтгэл байвал зууханд гал олдоно гэгчээр хувиасаа болон боксод дур сонирхолтой, дэмждэг зарим нэгэн хүмүүсийн хүчээр тохижуулаад л явж байна. Саяхан блок авч ханыг нь өрсөн. Мөн ИТХ-ын төлөөлөгч Н.Алтаншагай нарын хүмүүс цонхтой болгож өглөө. Одоо резинэн будгийн ажил бий. Энэ асуудлыг шийдчихвэл мэргэжлийн заалтай болчих юм. Энэ заал ашиглалтад орсноор тамирчдын маань ур чадвар, чанар чансаа дээшилж, тэмцээн уралдаанд үзүүлэх амжилт ахих нь гарцаагүй.

Dornod.NET

URL: http://www.choibalsan.mn/index.php?newsid=413