Уул уурхайн яамнаас өчигдөр хэвлэлийн бага хурал хийлгэлээ.

Уг хурал дээр "хөрөнгө оруулалт ихээр шаардагддаг, үнийн хэлбэлзэл ихтэй бүтээгдэхүүн үйлдвэрлэдэг олборлох үйлдвэрлэлийн салбарын эрх зүйн орчин урт хугацаанд тогтвортой байх нөхцөл бүрдсэн” хэмээн олзуурхаж буйгаа мэдээллээ.

УИХ-ын хаврын чуулганаар Ашигт малтмалын тухай хуульд нэмэлт , өөрчлөлт оруулсан нь ихээхэн шүүмжлэл дагуулж байгаа. Учир нь уг хуулийг батлахдаа сөрөг хүчин, ард иргэдийн саналыг огт тусгаагүй юм.

Тиймээс дахиж өөрчлөгдөхгүй гэх баталгаа харагдахгүй байгаа юм. Уг хуулийн хамгийн их шүүмжлэл дагуулсан заалтуудын нэг нь хайгуулын тусгай зөвшөөрлийг өргөдлөөр өгөх юм.

Ашигт малтмалын хайгуулын тусгай зөвшөөрөл шинээр олгохыг хориглох тухай хуулийг 2014 оны долдугаар сарын 1-ний өдрийн хуулиар хүчингүй болсонд тооцсон.

Улмаар Ашигт малтмалын тухай хуулийн 18 дугаар зүйлд заасны дагуу хайгуулын тусгай зөвшөөрөл хүссэн өргөдлийг Ашигт малтмалын газар хүлээн авч шийдвэрлэж эхлэх бэлтгэлийг ханган ажиллаж байгаа тухай Уул уурхайн яам мэдэгдлээ.

Хуульд зааж өгснөөр хайгуулын тусгай зөвшөөрөл олгох боломжтой талбайг Монгол Улсын Засгийн газраас тогтоох бөгөөд тогтоосон талбайн мэдээллийг геологи, уул уурхайн асуудал эрхэлсэн төрийн захиргааны байгууллага (Ашигт малтмалын газар) өдөр тутмын сонин, өөрийн цахим хуудас болон байгууллагын гаднах дэлгэцээр олон нийтэд ил тод, нээлттэйгээр зарлах ажээ.

Ингээд "Монгол Улсын Засгийн газраас баталсан хайгуулын тусгай зөвшөөрөл олгох боломжтой талбайнуудаас төрийн захиргааны байгууллага нь эрдэс баялагийн салбарын бодлогод нийцүүлэн, тус байгууллагын ажлын ачааллыг харгалзан өргөдөл хүлээн авах талбайг тухай бүр хэсэгчлэн зарлахаар төлөвлөж байгаа” гэнэ.

Мөн Ашигт малтмалын газраас хайгуулын тусгай зөвшөөрөл хүссэн өргөдөл хүлээн авах дугаарыг цахим хэлбэрээр тараах бөгөөд улмаар энэ ондоо багтаан ашигт малтмалын тусгай зөвшөөрөл хүссэн өргөдлийг хүлээн авах ажиллагааг ч цахимжуулах зорилт тавин ажиллаж байгаа гэнэ.

Өмнө нь ашигт малтмалын зөвшөөрөл олгосон хэргээр олон хүн дээлээ нөмөрсөн.

Харин энэ удаагийн хууль тийм байдалд хүргэх үү гэдгийг одоогоор хэлэхэд хэцүү. Гэхдээ энэ удаагийн хуулиар Монгол улсын газар нутгийн тавны нэгийг өргөдлөөр олгохоор болсон нь бас л хардлага дагуулж байгаа юм.

Өргөдөл гаргагсад нь тэгэхээр хэн байх вэ. Тэд нь мэдээж дээдсийн таалалд нийцэгсэд л байж таарна.

Монгол улсын стратегийн ордод эзэн суугчдаас эхлээд стратегийн ордод багтах ёстой ордуудыг зувчуулагсад л өргөдлөөр Монгол орны тавны нэгийг хувааж авах нь гэх хардлага эндээс урган гарч байгаа юм.

Уул уурхайн яамны мэдэгдсэнээр "Монгол орны нийт нутаг дэвсгэрийн хэмжээ 156.6 сая га. Үүнээс:

-Ашигт малтмалын үйл ажиллагаа эрхлэх боломжтой талбай 35.4%

- Ашигт малтмалын тусгай зөвшөөрөл олгохыг хориглосон болон хориглох гэж байгаа талбай 63.5%.

Хууль, тогтоомжоор хязгаарласан болон БОНХЯ-аас хориглох гэж буй талбайнууд өөр хоорондоо давхцдаг бөгөөд нутаг дэвсгэрийн 64.6 хувийг эзэлж байна.
Ашигт малтмалын хайгуулын тусгай зөвшөөрөл олгож болох талбайг дээр дурдсан талбайтай давхцуулалгүйгээр тооцож үзэхэд нутаг дэвсгэрийн 27.7 хувь байна. Үүнд:

Сонгон шалгаруулалтын талбай:

-11.34 сая га буюу 7.2 хувь

Өргөдлөөр олгох талбай:

- 32.08 сая га буюу 20.5 хувь юм.

URL: http://www.choibalsan.mn/index.php?newsid=4333