Бразилийн алдарт хөлбөмбөгчин Деку өнөөдөр Монголд ирлээ. Тэрээр өнөөдөр гудамжны хөлбөмбөгийн "Tiger Street Football" тэмцээнд элч төлөөлөгчөөр оролцох юм байна. Тэмцээн уг нь энэ сарын 23-нд болно гэж байсан ч Декугийн гэр бүлийн гишүүний эрүүл мэндтэй холбоотойгоор өнөөдрийг хүртэл түр хойшилсон юм.

 Түүний элчээр оролцох "Tiger Street Football" тэмцээн өнөөдөр Драмын театрын талбайд 13:30-20:00 цаг хүртэл үргэлжилнэ.

Деку нь 1977 оны наймдугаар сарын 27-нд Бразилийн Сан Бернардо до Кампо хотод төржээ. 19 настайдаа өөрийн найз хөлбөмбөгчин Кажугийн хамт Португалд ирсэн. Энэ ирэхээсээ өмнө "Коринтианс”, "Насиональ” багуудад тоглож байсан бол Европт ирээд "Бенфика, "Порту”, "Барселона”, "Челси” гэсэн шилдэг клубт алба хашиж байлаа. Бразилд түүний хэрэг байгаагүй ч Европт ирээд Деку өөрийгөө таниулж чадсан. "Аваргуудын лиг”-ийн тэмцээнд хоёр өөр багийн өмнөөс түрүүлсэн цөөхөн хэдэн тоглогчийн нэг нь Деку. 2004 онд "Порту”-д, 2006 онд "Барселона”-д цом авсан. Харин шигшээ багийн хувьд "Евро 2004”-т мөнгө, "Герман 2006” дэлхийн аваргын дөрөвдүгээр байр эзэлж байжээ.

Г.Уянга
оллоо.мн

---