АНУ-ын Ерөнхийлөгч Б.Обама ""Исламын улс” тер­рорист бүлгийн эсрэг дараагийн шатны цохилт хийх зэвсэгт хүчний 1500 цэ­рэг Иракт очно” хэ­мээн хэлсэн талаар ВВС мэдээллээ.

Цагаан ордны төс­вийн газраас засаг за­хиргаа Конг­рессоос "Исламын улс” бүлэгтэй тэм­цэх тэм­цэлд зориулах 5.6 тэрбум ам.дол­лар хүс­сэн байна. Үүнээс 1.6 тэр­бумыг Иракийн ар­мийн дайчдыг бэлт­гэх сур­­­гуулилтын зар­далд зар­цуулах гэнэ.

Зэв­сэгт хүч­ний төв ко­манд­лалаас урьд нь Ирак, Сирийн нутагт байгаа тер­рористуудтай тэм­­цэх тэм­цэлд 1.1 тэрбум ам.дол­лар зарцуулсан талаар мэ­дэгд­жээ.

АНУ тэргүүтэй холбоот­нууд өнгөрсөн найм­ду­гаар сараас хойш Ирак, Кур­дын цэргүүдэд туслан тер­рористуудын байгаа га­зар нутагт хэдэн зуун удаа агаарын цохилт хий­сэн юм. Иракийн цэргүүд то­­моохон газрын тос бо­ловсруулах үйлдвэр байдаг Баижи хотын олонх дүүр­гийг өнгөрсөн долоо хоногт хяналтдаа авсан аж.

АНУ-ын Зэвсэгт хүчин Иракийн Мосул хотын ойролцоо "Исламын улс” тер­рорист бүлгийн авто­машины цувааг бөмбөгдсөн бө­гөөд толгойлогч нь ма­шинд явсан байх магад­лалтай гэнэ. Бүлгийн ко­­­манд­лагч нарын цуг­ла­рал­­тад оролцоод буцаж яв­сан террористууд 10 авто­ма­шинтай явжээ.

Энэ талаар Зэвсэгт хүчний ко­манд­лалын төлөөлөгчид сэт­гүүлчдэд мэ­дэгдсэн байна. Харин "Ис­ламын улс” бүлгийн тол­гойлогч амьд, шархадсан талаар хэвлэл мэдээллээр бичсэн аж.

Пентагоны хэвлэлийн төлөөлөгч Жон Кирби өн­гөрсөн аравдугаар сард хэ­лэхдээ холбоотнуудын агаа­рын цохилт "Исламын улс” бүлэгт их хэмжээний хохирол үзүүлсэн тул тер­ро­ристууд тактикаа өөрчилж эхэлсэн гэжээ.

Тэрбээр "Тер­­рористууд орлогын эх үүсвэр, команд­лалын байр, санхүүжилт, цэргийн сур­гуулилтын лагерь, олон тооны тээврийн хэрэгсэл бо­лон их буугүй болсон.

Түүнчлэн хэдэн зуун дайчнаа алдсан. Тэд өмнө нь байсан шигээ хот суу­рингуудын хооронд чө­лөө­тэй явах боломжгүй бол­сон” хэмээн тэмдэглэсэн аж.

Түүнээс гадна "Ис­ламын улс” бүлгийн гадаад орнуудад байгаа сал­баруудыг илрүүлж эхэл­жээ. Францын нийслэл Парис хотноо ажиллаж байсан 200 орчим гишүүнтэй сал­барыг өнгөрсөн долоо хоногт илрүүлсэн байна. Энэ салбар нь Ирак, Си­рийн нутаг дэвсгэрт байгаа тер­ро­ристуудыг зэр зэвсгээр хангадаг бай­жээ.

Иракийн Дотоод хэр­гийн дэд сайд Аднан аль-Асади Монакод болсон Интерполийн ерөн­­­хий ассамблейн ху­рал­­­дааны үеэр "Ирак, Францын таг­нуулын албад хамт­ран ажилласны дүнд тер­рорис­туудтай хол­боо­­той бүлэг хүмүүсийг ил­рүүл­сэн. Тэд­ний заримыг барив­чилсан” гэж хэлсэн аж.

Египетийн "Ансар Бейт аль-Макдис” хэт даврагч бүлгийг мөн "Исламын улс” бүлэгт зэр зэвсгээр тусалдаг гэсэн мэдээлэл нэг бус удаа гарч байжээ. Тиймээс Каирын хойд хэсгийн дүүрэгт байсан хэт даврагчдыг өнгөрсөн аравдугаар сарын эхээр илрүүлсэн байна.

Хэт даврагсад Сирид тулалдаж байгаа "Исламын улс” бүлэгт залуусыг элсүүлж байснаа хүлээжээ. Египетийн засаг захиргаа аравдугаар сарын 21-нд "Ансар Бейт аль-Макдис” бүлгийн долоон гишүүнд ялын дээд хэмжээ, хоёрт нь бүх насаар нь хорих ял оноосон аж.

"Исламын улс” тер­рорист бүлэг хохирол амсч, хүч нь саарч байгаа ч барууны орнуудад том хэм­жээний халдлага үйл­дэхээр төлөвлөж бай­гаа талаар Германы Хол­боо­ны тагнуулын албанаас анхааруулсан байна.

АНУ-тай холбоотон бол­сон ба­рууны орнуудын эсрэг халд­лага үйлдэхээ терро­ристууд өнгөрсөн есдүгээр сард хэлжээ. "Исламын улс”-ын дайчин аравдугаар сарын сүүлчээр Канад улсын парламентын байрны орчимд гал нээснээс хоёр цэрэг амиа алджээ.

Дашрамд дурьдахад, Ирак, Сирийн нутаг дэвс­гэрт байгаа террорис­тууд­тай хамт барууны ор­нуу­дын х­э­дэн мянган иргэн тулал­даж байгаа аж.

Н.Тунгалаг

---