Албан ёсны тоо баримтаар бол манай аймагт 3-8 сая зээр бий гэнэ. Сүүлийн хэдэн жилд зээрээ тоолоогүй учир энэ нь нэлээд эрт үеийн тоо бололтой юм. Зээрийг тоолоход тийм ч амар биш, тусгай аргаар багцаалсан тоог гаргаж болдог гэх, Жил бүрийн өдий үед цагаан зээр тарга тэвээргээ бүрэн авахтай зэрэгцэн хулгайн ан хүчээ авдаг. Гэхдээ 2010-2014 онд хэрэгжсэн төслийн ачаар манай аймагт хууль бус хулгайн антай тэмцэх хамтарсан баг ажиллаж, илрүүлэлт сайжирчээ. Ер нь бол зээр агнах зөвшөөрлийг Байгаль орчны Яамнаас нэг зээрийг 100 мянган төгрөгөөр үнэлэн өгдөг байна. Гэтэл 100 мянган төгрөгөөр зээр агнах зөвшөөрөл авч байхын оронд хонины бүтэн гулууз худалдаад авчих нь илүү учир зөвшөөрөл авахаар огт хандахаа больжээ. Засгийн газрын 2011 оны 23 дугаар тогтоолоор ооныг 500 мянган төгрөг, шаргачинг 550 мянган төгрөгөөр үнэлжээ.

 

Ахуйн зориулалтаар хууль бусаар цагаан зээр агнасан тохиолдолд энэ үнэлгээг буруутай этгээдээр 2 дахин нугалж төлүүлэх ба хууль бус ан хийсэн иргэнийг хөдөлмөрийн хөлсний доод хэмжээг 2-4 дахин нугалж торгоно гэж "Ан агнуурын тухай хууль"-д заасан байна. Хэрвээ хууль бусаар нэг ооно агнасан тохиолдолд 1 сая 380800 төгрөгийн нөхөн төлбөр төлөх шаардлагатай болж байгаа юм. Харин дээрх үнэлгээний хувьд амьдралын боломж муутай айлд хүндхэн цохилт болдог нь ойлгомжтой. Хоол хүнсээ залгуулах гэж нэг зээр агначихаад нөхөн төлбөрөө төлж чадахгүй, хууль цагдаагийн байгууллагаар явах зэрэг хэн хэндээ хэцүүхэн асуудал тулгардаг бололтой. Гэсэн хэдий ч баригдсан тохиолдолд хэн ч байсан хуулийн хариуцлага хүлээх учраас иргэдийг хулгайгаар ан агнахгүй байхыг Байгаль орчны газраас анхааруулж байна.