Дамдинбазарыг ажлаас чөлөөлж, Аръяазулыг аймгийн Газрын харилцаа, барилга хот байгуулалтын газрын даргыг түр орлон гүйцэтгэгчээр томилсон тухай захирамжийг аймгийн Засаг дарга С.Ганбат саяхан гаргажээ. Гаднаасаа бол ажлаас халсан сольсон байдаг л асуудал. Үндэслэл нь гээд харвал, ажилдаа тэнцэхгүй гэдэг шалтгаан. Тус газрыг 11 жил удирдаж, улсад тэргүүлж явсан хамт олны амжилт гээд яривал бас бус юм байгаа л байх. Энэ тухай асуудал өнөөдөр тэгтлээ сонин биш. Харин Аръяазул гэдэг хэн бэ гэдгийг олон нийт илүүтэй сонирхож байгаа. Газрын албанд энэ хүн шинэ хүн ч биш, олон жилийн өмнө даргынхаа өрөөнд түлхүүр тааруулж орж байгууллагынхаа "толгой” компьютрын хаардыг хулгайлахыг завдсан зэргийг нь залуу насны болчимгүй явдал гээд орхичихьё. Гэтэл одоогоос 3 жилийн өмнө өөрийн хүсэлтээр тус газрын мэргэжилтний албанаас чөлөөлөгдсөн. Ажлаасаа гэнэтхэн гарах болсон учир шалтгаанаа "нөхрийнхөө хийсэн хэрэг”-ийг өөрөө үүрэх болсноор тайлбарласан байдаг. Дээрх албан тушаалд томилогдохын өмнө тэрээр аймгийн Тамгын газарт жирэмсний амралтаа эдэлж байсан хүний оронд түр ажиллаж байсан юм. Төрийн албанаас өөрийн хүсэлтээр чөлөөлөгдөхөд төрийн албаны шалгалтыг дахин өгч, тэнцэж байж албан тушаал хаших эрх нь үүсдэг хууль номтой. Тийм болохоор дээрх захирамжийн тухайд "түр орлон гүйцэтгэгч” гэдэг нэр томъёог хэрэглэхээс аргагүй. Өнгөрөгч зун аймгийн орлогч дарга М.Бадамсүрэн БНСУ-д явахдаа хүний оронд түр ажилд орсон Аръяазулыг хамт дагуулж явж, төрийн албаны жинхэнэ албан хаагч хэр нь гадагшаа дотогшоо явж үзээгүй олон хүний атаархлыг төрүүлж хэсэгтээ л жиг жуг хийлгээд авсан. Семинар нэрээр сэм "найрт” явсан тэдний тохиролцоо дээрх халгаа сэлгээ байсан ч байж болох хардлагыг бас дагуулж байна. Орлон гүйцэтгэгчийн хувьд жинхлэх хүртлээ хугацаа байгаа болохоор цааш өрнөх үйл явдал илүү сонирхолтой ч байж мэднэ. Харж л сууя.

---