Улаанбаатар Пийс Авенью, Ротари клуб, АНУ-ын Капитал Сити Санрайз ротари клубтэй хамтран Улаанбаатар хотоос алслагдсан таван  сумыг сонгон "Жаргалан” нэртэй эх, хүүхдийн эндэгдлийг бууруулах, урьдчилан сэргийлэх төслийг хэрэгжүүлжээ. Төслийн  хүрээнд алслагдсан сумдын эмнэлгийн төрөх тасгийг иж бүрэн тоног төхөөрөмжөөр хангаж эх, хүүхдийн эрүүл мэндийн үйлчилгээг сум орон нутагтаа түргэн шуурхай, чанартай хүлээн авах боломжийг бүрдүүлж өгсөн байна. Клубынхэн төсөлдөө Завхан аймгийн Сантмаргаз сум, Дорнод аймгийн Баяндун сум, Булган аймгийн Хялганат тосгон, Говьсүмбэр аймгийн Сүмбэр сум, Өмнөговь аймгийн Ханбогд сумыг хамруулсан байна. Жаргалан төслийн хүрээнд алсагдсан сумын иргэдэд ихээхэн шаардлагатай байгаа зөөврийн эхо аппарат, нярайн инкубатор, эх, нярайн үзлэгийн багаж, тоног төхөөрөмж, төрөх ор, эхийн болон ургийн зүрхний цохилт хэмжих монитор, хүүхдийн ор, хүүхдийн жин, эх нярайд шаардлагатай эд материалын дэмжлэгийг хүн эмнэлэг тус бүрт олгожээ.

Хөдөөгийн сумдад эх нярайн эндэгдэлийг бууруулах, малчдад  эрүүл мэндийн үйлчилгээг ойртуулахад энэхүү ажил ихээхэн туслалцаа үзүүлэх бөгөөд ойролцоох сумын иргэдэд ч нээлттэй байх юм байна. Энэ  оныг Эрүүл мэндийн яамнаас Эх хүүхдийн эрүүл мэндийг дэмжих жил болгон зарласан энэ үед сайн санаат Ротари клубын залуус АНУ-ын ротари клубынхэнтэй хамтран энэхүү буянтай ажлыг зохион байгуулж нэг суманд 300 орчим сая төгрөгийн тоног төхөөрөмжийг хандивласан бөгөөд нийт 1,5 тэрбум төгрөгийн хөрөнгө оруулалтыг хийжээ. Эх, хүүхдийн эрүүл мэндийг хамгаалахад нийгмийн салбаруудын хамтын ажиллагаа дутагдалтай, эх, нярай, хүүхдийн өвчлөл, эндэгдэлд алслагдсан, тусламж, үйлчилгээний хүртээмжийн тэгш бус байдал, ядуу, эмзэг бүлгийн эмэгтэйчүүд, хүүхдүүд шилжилт хөдөлгөөнтэй холбоотой тусламжаас хожимдох зэрэг нөлөөлж байдаг байна. Энэхүү төслийг амжилттай хэрэгжүүлэхэд Сандвик Монголиа ХХК, ЭМЯ, СЯ болон Нийслэлийн Гаалийн Газраас дэмжиж ажиллажээ.

С.САРУУЛ /ЗУУНЫ МЭДЭЭ/

URL: http://www.choibalsan.mn/index.php?newsid=6803