УИХ-ын Аюулгүй байдал гадаад бодлогын байнгын хорооны өчигдрийн хуралдаанаар Засгийн газрын бүтэц бүрэлдэхүүний тухай хуулийн теслүүдтэй хамт өргөн баригдсан Цөмийн энергийн тухай хуульд нэмэлт, өөрчлөлт оруулах тухай хуулийн төслийг хэлэлцлээ.

Уг хуулийн төсөл нь Засгийн газрын бүтэц бүрэлдэхүүн өөрчлөгдөж байгаатай холбоотойгоор Цөмийн энергийн газрыг татан буулгах асуудлыг зохицуулж байгаа юм. Цөмийн энергийн газрыг татан буулгахдаа чиг үүргийг нь өөр газарт хариуцуулахаар тусгажээ. Тухайлбал, цацраг идэвхт ашигт малтмал болон цөмийн энерги ашиглах, цөмийн технологи нэвтрүүлэх, цөмийн болон цацрагийн аюулгүй байдлыг хангах үйл ажиллагаанд тавих хяналтыг Мэргэжлийн хяналтын ерөнхий газарт, цацраг идэвхт ашигт малтмал эрэх, хайх, ашиглах тусгай зөвшөөрөл олгох, түдгэлзүүлэх, хүчингүй болгох бүрэн эрхийг Уул уурхайн яаманд шилжүүлэхээр заажээ.

Мөн энэ салбарын үйл ажиллагааг Ерөнхий сайдын мэдэлд ажиллах Цөмийн энергийн комисс хариуцах юм байна. Улмаар энэхүү хуулийн төслийг Байнгын хорооны хуралдаанд оролцсон гишүүдийн олонхи нь дэмжсэн юм.

ҮНДЭСНИЙ ШУУДАН

URL: http://www.choibalsan.mn/index.php?newsid=7487