Өнөөдөр буюу 2015.02.04-нд Чингисийн талбайд Монголын үр тариа эрхлэгчдийн холбооноос засгийн газрын ОХУ-аас үр тариа импортлох гэрээг эсэргүүцэн жагсаал хийж байна.

 

Тэдний үзэж байгаагаар монголд тариалсан үр буудайгаа хог мэтээр үзэж гадны бүтээгдэхүүнийг дээдлэн шүтэж байгаа байдлыг өнөөгийн Шийдлийн засгийн газрын буруу шийдвэр бөгөөд Монгол аж үйлдвэрээ дэмжихгүй байгаагийн илрэл бөгөөд ард иргэд болон тариаланчдаа хууран мэхэлсэн явдал гэж эрс эсэргүүцэж энэхүү жагсаалыг зохион байгуулж байгаа ажээ.

 

 МОНГОЛ УЛСЫН ЕРӨНХИЙЛӨГЧ Ц.ЭЛБЭГДОРЖ, МОНГОЛ УЛСЫН ИХ ХУРЛЫН ДАРГА З.ЭНХБОЛД, МОНГОЛ УЛСЫН ЕРӨНХИЙ САЙД Ч.САЙХАНБИЛЭГ ТАНАА
Шаардлага хүргүүлэх тухай:
Монголын үе үеийн Засгийн Газар хүнсний аюулгүй байдлыг хангахыг төрийн бодлого болгон, Атрын 1, 2, 3-р аяныг амжилттай хэрэгжүүлсний дүнд 2014 онд сүүлийн 23 жил аваагүй арвин ургац 489 мянган тонн үр тариа хураан авснаас 350 мянган тонн улаанбуудайг дотоодын гурилын үйлдвэрүүдэд нийлүүлж, дотоодын гурилын хэрэгцээ хангалттай чанартайгаар бүрэн хангагдсан. Үүнийг МХЕГ-ын итгэмжлэгдсэн лабораториудаас гадна ОХУ, Өмнөд Солонгосын лабороториуд нотлосон болно.

 

Гэтэл Монгол улсын ерөнхий сайд Ч.Сайханбилэг та "ШИЙДЛИЙН" засгийн газрыг байгуулсан даруйдаа гадаадаас их хэмжээний гурил (11'500тонн), улаанбуудайг (20'000тонн) импортлох шийдвэр гаргасан нь олон мянган тариаланчдын хөдөлмөрийн үнэ цэнэ, ололт амжилтыг үнэгүйдүүлэх, монголын ард түмний нийтлэг эрх ашгийг хохироох уршигтай шийдвэр хэмээн тариаланч бид харамсан бухимдаж байна.

 

Эдийн засгийн хямралын улмаас иргэдийн худалдан авах чадвар эрс муудаж, тэр хэрээр гурилын үйлдвэрүүдийн агуулах сав гурил, буудайгаар дүүрэн байна. Тариаланчдаас авсан улаанбуудайн төлбөр одоо болтол төлөгдөөгүй, 2014 оны улаанбуудайн үнийн зөрүү 100 мянган төгрөг олгогдохгүй байгаа нь тариаланчид, тариалангийн компаниудыг банкны зээл, зээлийн хүүгийн дарамт, татвар нийгмийн даатгалын хуримтлагдсан өр төлбөр, валютын ханшын зөрүүгийн алдагдал гээд олон давхар алдагдал, дарамтад оруулж байхад Та болон танай засгийн газар ашиг эрэлхийлсэн хэдхэн хүний үгээр баримжаалан бусармаг шийдвэр гаргаж байгааг бид жигшин эсэргүүцэж байна.

 

Эдийн засгийн хүндрэлтэй үед зардал хэмнэнэ, хэрэглээг хасна гэж Та өдөр бүр популизм хийх мөртлөө үйлдэл дээрээ мөнгөтэй бизнесийн бүлэглэл болох Улаанбаатар Гурил ХХК, Од Групп ХХК зэрэг цөөн хүний эрх ашигт үйлчилж, төгрөгийн ханшны уналтыг гурилын импортоор өөгшүүлж буй "Ам Ажлын Зөрүүг" чинь ард түмэн харж байгаа.

 

Ерөнхий сайд Ч.Сайханбилэг та Цагаан сараар үндэсний үйлдвэрлэлээ дэмжиж мөнгөө дотооддоо үлдээе гэж уриалах атлаа дотоодын чанартай гурилыг үгүисгэн дорд үзэж, 30 тэрбум төгрөгийн гурилыг цагаан сарын хэрэглээ хэмээн оросоос импортлож байгааг монголчууд юу гэж ойлгох вэ?
Хэдий болтол монголын төр хэлснээ хэрэгжүүлэлгүй хоёр нүүр гаргаж байх юм бэ?

 

Монголын үр тариа эрхлэгчдийн "Газар Тариалан Холбоо" нь олон мянган тариаланчид болон гурил хэрэглэгч 3 сая иргэнийхээ эрх ашгийн өмнөөс дараах шаардлагыг хүргүүлж байна.
-     Үндэсний үйлдвэрлэгч, ард түмнийхээ эрх ашгийн эсрэг гаргасан - Гурил, улаанбуудайн импортлох шийдвэрээ нэн даруй цуцлах.
-     Ажлаа мэддэггүй, салбарынхаа эрх ашгийг уландаа гишгэсэн ёс зүйгүй сайд Р.Бурмааг нэн даруй ажлаас нь чөлөөлж, хариуцлагагүй үг үйлдэл, худал мэдээллийнх нь төлөө шүүхэд шилжүүлэх.

Төрөөс газар тариалангын талаар баримтлах бодлогыг тодорхой болгож дотоодын газар тариалангын үйлдвэрлэлийг бодлогоор дэмжин хөгжүүлэх, хамгаалах, дунд болон урт хугацааны бодлого хөтөлбөр боловсруулан тогтвортой мөрдөх.

 

Шударга Өрсөлдөөн Хэрэглэгчийн Төлөө Газар нэр бүхий гурилын үйлдвэрүүд төрийн санхүүгийн дэмжлэг болон импортын улаан буудайн квотыг монополь давуу эрхтэйгээр байнга авч байгааг 2015 оны 2-р сарын 18-ны дотор хянан шалгаж, хуулийн хариуцлага хүлээлгэх.
-     2014 оны тариалалтын өмнө төрөөс амласан улаан буудайн үнийн зөрүү 100,000 төгрөгийг тариаланчдад одоо болтол олгоогүй байгааг 2015 оны 2-р сарын 18-ны дотор бүрэн олгох. Төр иргэдээ хууран мэхлэж, луйвардах ёсгүй.
Цаашид улаан буудайн үнийг чөлөөлж, төрийн оролцоог арилган, экспортын хоригийг цуцлах
-     Улаанбуудайн импортын татварыг 25%-аас доошгүй хуваарь нэмэгдүүлэх.

 

Та болон танай Засгийн газар дээрх шаардлагуудыг хүлээн аваагүй тохиолдолд:
Энэ жил улаан буудайн үнийн зөрүүнд 100,000 төгрөгийг олгох эсэхээ 2015 оны 2-р сарын 18-ны дотор мэдэгдэхийг шаардаж байна. Үүнээс оройтвол улаан буудайг цаг хугацаанд нь тариалах боломжгүй болох бөгөөд үүнээс үүдэн гарах хариуцлагыг монголын ард түмний өмнө Та болон танай засгийн газар дангаар хариуцах болно.

 

Олон мянган тариаланчид болон тариалангийн компаниуд санхүүгийн алдагдал, банкны хүүнд алдсан мөнгө, бизнесийн хохирлоо Танаас болон танай "ШИЙДСЭН" засгийн газраас нэхэмжлэн шаардах болно.
-     Ард түмнийхээ язгуур эрх ашгийг хөсөрдүүлдэг, дуу хоолойг нь сонсдоггүй Засгийн Газрын тэргүүн, Засгийн Газрыг огцрох хүртэл шат дараалсан тэмцлүүдийг тариаланчид зорилгодоо хүртлээ тууштай өрнүүлэх болно.

 

 

 

 

"МОНГОЛЫН ҮР ТАРИА ЭРХЛЭГЧДИЙН
ГАЗАР ТАРИАЛАН ХОЛБОО"
УЛААНБААТАР ХОТ 2015 ОНЫ 02 САРЫН 04