Өнгөрөгч баасан гаригт Дорнод аймгийн ИТХ-ын Гадаад харилцаа, аялал жуулчлалын бодлогын хороо хуваарь ёсоор хуралдлаа. Хуралд бодлогын хорооны дарга Б.Өлзийбаян, гишүүд Батжаргал, Н.Хүрэлбаатар, Д.Урансувд нар оролцлоо. Хурлын эхэнд аймгийн ЗДТГ-ын Гадаад харилцааны асуудал хариуцсан мэргэжилтэн Э.Гансүх 1-р сард Дорнод аймаг болон БНХАУ-ын ӨМӨЗО-ны Хөлөнбуйр хот, Хянган аймгуудын хамтын ажиллагааны хүрээнд зохион байгуулагдсан арга хэмжээ, ажлын айлчлалын талаар мэдээлэл өглөө. Хөлөнбуйр хотын дэд дарга Дорнод аймагт хийсэн албан ёсны уулзалт дээрээ БНХАУ-ын Худалдааны яамны Олон улсын худалдаа, эдийн засгийн хамтын ажиллагааны судалгааны хүрээлэнгийн боловсруулсан "Хятад, Монголын Өвдөг-Баянхошууны хил дамнасан эдийн засгийн хамтын ажиллагааны бүсийн ерөнхий төлөвлөгөө, судалгаа” нэртэй 60 хуудас бүхий судалгааны материалыг аймгийн Засаг даргын орлогчид хүлээлгэн өгсөн байна.

 

Энэхүү материалыг аймгийн ИТХ-ын Гадаад харилцаа, аялал жуулчлалын бодлогын хорооны дараагийн хуралд танилцуулах юм. Дорнод аймгийн Аялал жуулчлалын мастер төлөвлөгөөг боловсруулах төсөв энэ оны төсөвт суусан. Энэ дагуу аймгийн аялал жуулчлал салбарын судалгааны ажлын даалгаврын төсөл боловсруулсныг Байгаль орчин, аялал жуулчлалын газрын мэргэжилтэн Б.Ганзориг танилцуулав. Манай аймагт аялал жуулчлалын салбарын бүтээгдэхүүн үйлчилгээгээрээ бусад аймгуудтай өрсөлдөх давуу талаа тодорхойлж, аялагчид болон жуулчдыг орон нутагтаа татан, аймгийн хэмжээнд ажил эрхлэлт ба орлогын эх сурвалжийг нэмэгдүүлэхэд чиглэсэн суурь судалгаа зайлшгүй хэрэгтэй. Иймээс энэхүү судалгааны даалгаврыг Бодлогын судалгаа, орчны судалгаа, эрэлтийн шинжилгээ, аялал жуулчлалын бүтээгдэхүүний хувилбар шийдлүүд, хөрөнгө оруулалтын тооцоолол, санхүү эдийн засгийн шинжилгээ, эрсдэлийн шинжилгээ гэсэн долоон суурь судалгаа хийхээр боловсруулжээ. Бодлогын хорооны гишүүд судалгааны ажлын даалгавартай танилцан, улмаар дэмжиж, тэргүүлэгчдийн хуралдаанаар хэлэлцүүлэхээр тогтов.