Исламын улс бүлэглэлийн цэргүүд Иракийн хойд хэсгийн Мосул хотод исламын шашныг үүсэхээс өмнөх урлагийн бүтээлүүдийг эвдэлж, сүйтгэж байгаа дүрс бичлэгийг пүрэв гарагт олон нийтийн мэдээллийн хэрэгслээр цацсан байна.

Таван минутын турш үргэлжлэх энэхүү дүрс бичлэг Иракийн Мосул хотын музейн томоохон баримал, урлагийн бүтээлүүдийг лантуугаар цохиж, хэдэн хэсэг болгон тарааж сүйтгэж байгааг харуулжээ.



Исламын улс бүлэглэлийн гишүүд тус хотын археологийн талбай дахь Ассирийн маш том далавчит бухыг сүйтгэхдээ өрөмдөгч төхөөрөмжийг ашиглав. Камерын өмнө исламын бүлэглэлийн сахал самбаандаа дарагдсан нэг гишүүн "Муслимчууд аа, бидний ард байгаа эдгээр бүтээл бол эртний хүмүүсийн бурхны оронд шүтэж ирсэн баримлууд юм. Ассиричүүд, аккадчууд болон бусад хүмүүс борооны, газар тариалангийн, дайны зэрэг бурхадтай байсан. Тэд өргөл барьц өргөх замаар тэдгээр бурхдад ойртохыг хичээдэг байсан. Тиймээс бид адислагдсан гараараа тэдгээр баримлыг устгаж, булшиллаа” хэмээн хэлсэн байна.

Шинжээчид Исламын улс бүлэглэлийн дайчдын хийсэн бичлэгт эртний урлагийн жинхэнэ бүтээлүүд болон сэргээн засварласан бүтээл ч байсан хэмээн хэллээ. Ийнхүү Исламын улс бүлэглэл Иракийн Мосул хотыг системтэйгээр эзэлж аваад соёлын өвийг устгаж дэлхий нийтийн зэвүүцлийг төрүүлээд байна.

URL: http://www.choibalsan.mn/index.php?newsid=8152