"Эрдэнэс Тавантолгой” компанийн гүйцэтгэх захирал Я.Батсуурийг АТГ-аас шалгаж, цагдан хориод байна. Түүнийг саатуулсан даруйдаа сэжигтнээр тооцож, хорих хугацааг 14 хоногоор сунгаад байгаа юм. Я.Батсуурийг шалгах болсон  үндэслэл нь Ерөнхий сайд асан Н.Алтанхуягийн хүргэн, "Эрдэнэс Тавантолгой” компанийн ТУЗ-ын даргаар ажиллаж байсан, ЗГХЭГ-ын дэд даргын албан тушаалд сууж байсан Г.Дэнзэнгийн хэрэгтээ холбоотой. Г.Дэнзэн нь өөрийн эзэмшлийн гэгдэх "Говь повер” компанид эвлэрлийн  гэрээний дагуу шилжүүлсэн 4.65 тэрбум төгрөгийг завшсан хэрэгт шалгагдаж байсан юм.

Мөн уг хэрэгт Ерөнхий сайд асан Н.Алтанхуягийн хамаатуулан шалгаж байгаа талаар АТГ-ын эх сурвалж мэдээлж байна.

Юутай ч Ерөнхий сайд асан Н.Алтанхуягийн хүргэн Г.Дэнзэнд АТГ-аас эрүүгийн хэрэг үүсгэн шалгаж байгаа юм. Гэтэл Г.Дэнзэнгээс байцаалт авах болоход тэрбээр хаана байгаа нь тодорхойгүй байгаа аж. Тодруулбал, Г.Дэнзэнгийн гар утас нь салгаатай, гэртээ байхгүй, очиж болох газрууддаа ирэхгүй байгаа юм байна.

Учир нь Г.Дэнзэн нь гэр бүлийнхээ хамтаар гадаад руу явсан болох нь тодорхой болжээ. Хэдийгээр Г.Дэнзэнг хууль хяналтын байгууллагаас шалгаж байсан ч албан ёсоор эрүүгийн хэрэг үүсгээгүй байсан аж. Мөн улсын хилээр гаргахгүй байх шийдвэр ч гараагүй байсан юм байна. Тиймээс Г.Дэнзэнгийн хилээр гарах нээлттэй байсан учраас ийнхүү гэр бүлийн хамтаар хил нэвтрээд байгаа аж.

Б.Анир 

URL: http://www.choibalsan.mn/index.php?newsid=8264