Энэ сарын 21 ний өдөр Баяндун сумын төв Наран багийн С.Мөнхжаргал нарын хашаанд галзуу чоно орж ирж айлын нохойг урж, хоёр ч үхрийг барьсан байна.

Галзуу чоныг Наран багийн Засаг дарга Б.Баттөмөр буудаж устган, сэг зэмийг шатаан малын эмч мэргэжилтнүүд үзлэг хийн чононд хазуулсан үхрийг тусгаарласан байна. Дээрх чонын толгойг түргэн тестийн аргаар шинжлэхэд галзуу өвчтэй болох нь нэгэнт тогтоосон байна.

"Галзуу өвчинтэй тэмцэх заавар”-ын дагуу сумын Засаг дарга захирамж гарган хязгаарлалтын дэглэм тогтоов. Одоогоор Буяндун суманд 68 эзэнгүй нохой, муурыг буудаж устган чононд хазуулсан 2 үхрийг шатаажээ. Сумын төвийн 13 өрхийн үхэр, адуу, нохой, муурыг вакцинжуулаад байна. Иймд малчдад хандан галзуу чоно болон үнэг, хярс, нохойноос болгоомжлохыг холбогдох байгууллагуудаас сэрэмжлүүлж байна. Галзуу өвчин туссан дээрх амьтад хүнээс айхаа больж шууд айлын хот хороо болон, мал руу дайрдаг. Үүнээс нь галзуу гэдгийг мэдэж болох гэнэ.

Ч.МӨНХБАТ

URL: http://www.choibalsan.mn/index.php?newsid=899