Бадамсүрэн гэдэг энэ хүний тухай "ямар үйлтэй амьтан бэ” гэх халаглал нийгэмд ид явж байна. Орон нутгийн сонгуулиар Ардын нам ялалт байгуулж, аймгийн Засаг даргад өөрийн намын энэ хүнийг гурвантаа зүтгүүлээд бүтэлгүйтсэн. Энэ нь Монгол Улсын Ерөнхий сайд асан Н.Алтанхуяг улс төржүүлээд буцаагаад байсан хэрэг огтхон ч биш хуулинд заасан шалгуурт нь тэнцэхгүй хүнийг зүтгүүлээд байсанд юм. Монгол Ардын нам Дорнодод ганцхан Бадамсүрэн гэдэг хүн байдаг шиг аашилж, энэ нь гаднаасаа олон хүний гайхширлыг төрүүлдэг. Ардын намын лидерүүд нь саяхан Дорнодод ирж, Бадамсүрэн гэдэг хүнийг удахгүй аймгийн Засаг дарга болно гэж хээв нэг хэлнэ лээ. Хэлэхэд бас учир бий. Аймгийн Иргэдийн хурлын даргын нэр дээр Засгийн газрын Хэрэг эрхлэх газрын даргаас шаардлагад тэнцэх хүнээ нэр дэвшүүлж ирүүлнэ үү гэсэн албан тоотыг хэд хоногийн өмнө ирүүлсэн. Тэнцэхгүй хүнийг зүтгүүлээд байдаг болохоор Дорнодын хувьд зориуд анхааруулж бичиг тоот илгээсэн нь тэр биз. Намынх нь нөхөд наанаа ийн "хөөрөгдөөд” байгаа болохоор тэрүү аймгийн Засаг даргын сэнтийд очих гэж Бадамсүрэн урьдынхаасаа улам илүү улайрч эхэллээ. Улайрахын хэрээр булхай будлиан нь захаасаа дэлгэгдэж, эх сурвалжийн мэдээлснээр Цагдаад шалгагдахдаа хүртэл тулж байгаа дуулдана. Төрд аж:илласан жилээ гүйцээх гэж энэ хүн ёстой л эр хүний 13 мэхийг хэрэглээд ч энэ удаад нэмэр тусыг олохгүй нь бололтой.
Баримтанд тулгуурлая. Орон нутгийн сонгуулийн дараа Бадамсүрэн Аймгийн Засаг даргын сэнтийд зүтгээд дийлэхгүй болохоор 2012 оны 11 дүгээр сарын 27 ны өдрийн Хэрлэн сумын Засаг дарга Ж.Энхцэцэгийн Б\17 тоот захирамжаар Хэрлэн сумын Засаг даргын орлогчоор томилогджээ. Ингэхдээ 610 мянга 80 төгрөгийн үндсэн цалинтай, үндсэн цалингаас нь тооцон онцгой нөхцлийн 30 хувийн нэмэгдэл цалинтайгаар шүү.

Энэ хэрийн цалин, нэмэгдэл аваад Бадамсүрэн гэдэг хүн төрийн албыг түвшин сайхан залгуулж уу гэвэл, үгүй гэнэ. Ажилдаа огт үзэгддэггүй байсныг ойр тойрныхон нь баталдаг. Өөр хэн нэгэн ингэж төрийн албыг замируулсан бол аль хэдүйн ажлаас халагдаж, арга хэмжээ авагдаж таараа. Гэтэл тэрээр бүтэн 5 сарын турш ийм байдлаар өдөр хоног өнгөрөөж явсан хэрэг. Ингэж явсаар 2013 оны 5 дугаар 15 ны өдөр "хүндэтгэх шалтгаанаар хүсэлт гаргасан тул” гэсэн үг үсэгтэй захирамжаар Хэрлэн сумын Засаг даргын орлогчийн ажлаас чөлөөлөгдсөн байдаг.

Хийсэн юмгүй, хий нэр зүүж явна гэдэг ичих булчирхайтай хэнд ч эвгүй л дээ. Түүнийгээ гэнэтхэн ухамсарлаад өөрийн хүсэлтээр ажлаас чөлөөлөгдсөн юм байх гэж ойлгосон нь үгүйсэнж. Дээрх ажлаас халагдаагүй байхад нь \ажлаас халсан, ажилд авсан тушаалын огноо зөрүүтэй\ Аймгийн Засаг даргын орлогч Л.Хишигтогтох 2013 оны 05 дугаар сарын 14 ний өдрийн Б\30 тоот захирамжаар Мягмарсүрэнгийн Бадамсүрэнг 2013 оны 05 дугаар сарын 13 өдрөөс эхлэн аймгийн Засаг даргын зөвлөхөөр томилсугай гээд 776 мянга 743 төгрөгөөр цалинжуулахыг үүрэгджээ.

Төрийн албаны тухай хуулинд "Улс төрийн албан тушаалтны бүрэн эрхийнх нь хугацаанд зөвхөн өөрт нь үйлчлэх орон тооны зөвлөх…” гэсэн заалт бий. Гэтэл үйлчлэх ёстой хүн нь эзгүй байхад зөвлөх томилсон нь Бадамсүрэн гэдэг хүнийг хууль зөрчөөд ч болов ажилтай, цалинтай байлгах гэж үгсэн хуйвалдсан хэрэг гэхээс өөрөөр яаж тайлбарлалтай. Илтэд хууль зөрчсөн энэ захирамжийг Ц.Жанлав дарга ирэнгүүтээ хүчингүй болгож, түүний ажиллаж байх хугацаандаа авсан цалинг буцааж төлүүлэхээр шийдвэр гаргасан.

Цаг хугацааны хувьд дараагийн хүн болох С.Ганбат аймгийн Засаг даргаар томилогдсон ч төрийн залгамж халаа болох үүднээсээ өмнөх захирамжийн заалтыг хэрэгжүүлэх үүргийг энэ хүн хүлээх учиртай. Гэтэл С.Ганбат энэ захирамжийг хэрэгжүүлэх нь бүү хэл харин ч эсрэгээр нь аймгийн Засаг дарга Ц.Жанлавын Б\47 тоот захирамжийг хүчингүй болгож Бадамсүрэнд тал засч саймширч, саймшрахаар барах уу аймгийн Засаг даргын орлогчоороо авч ажиллуулсан. Одоо ч энэ албанд тэр хэвээр.
Хүний санаа мухаргүй хойно Бадамсүрэн гэдэг хүн иймэрхүү булхай будлианаар энэ хэрийн өндөрлөгт хүрчихсэн болохоор тэр үү, улам даварч Аймгийн Засаг дарга болох гэж улайрч улангасч явна. Хуулийг уландаа гишгэж, ууж идэж, ашиглаж завшихын дон туссан эрх мэдэл, албан тушаалд шүлэнгэтсэн ийм хүн төрийн сэнтийд заларвал яана даа гэх айдаст Дорнодынхон автаж эхэллээ.
Дорнод сонин

URL: http://www.choibalsan.mn/index.php?newsid=9239