Монголын залуучуудын холбооны салбар Улаанбаатар хот дахь Дорнод аймгийн Залуучуудын холбооноос санаачлан Дорнодын Манлайлагч-100 залуусын уулзалтыг өчигдөр буюу 2015 оны 5-р сарын 1-ний өдөр Улаанбаатар хотноо Чингис хаан зочид буудалд зохион байгууллаа. Энэхүү арга хэмжээнд улс төр, төрийн бус байгууллага, бизнес, аж үйлдвэр, эрүүл мэнд, боловсрол, худалдаа үйлчилгээний болон соёл урлаг, спортын салбарт амжилттай ажиллаж буй 100 гаруй Дорнодын залуус оролцож, нэгэн үдшийг дуу шуутай, дурсамж яриа, санал санаачилга дүүрэн өнгөрүүллээ.

Хүрэлцэн ирсэн залуус дунд урлаг, спортын салбарт нутгийнхаа нэрийг дуурсгаж яваа олон залуус ирсний дотор Элькондор хамтлагийн дуучин П.Хэрлэн, "Никитон” хамтлагийн даралтат хөгжимчин, хөгжмийн найруулагч А. Болорхүү, Нюанс хамтлагийн дуучин М.Амарсанаа, Ёодол дуугаар олны танил болсон залуу дуучин П.Баярцэнгэл болон ДЦС4 ТӨХК-ний дэргэдэх "Эрчим” хамтлаг, залуу дуучин Б.Энхзаяа нар ая дууны мэндчилгээ дэвшүүлсэн юм. Мөн Азийн наадмын алтан медальт, Дөнгөж саяхан Индонезийн Палембанг хотод болсон боксын олон улсын "А” зэрэглэлийн тэмцээнээс мөнгөн медаль хүртээд буй Д.Отгондалай оролцож, нутгийн боксчин Д.Идэрхүүг Казакстанд болж буй олон улсын тэмцээнээс алтан медаль хүртсэн баяртай мэдээг дуулгалаа.

Уулзалтын хөтөлбөрийн дагуу "Улстөрд шинэ манлайлагч” нэвтрүүлгийн шилдэг оролцогч Э.Жавхлан "Нийгмийн идэвхи ба манлайлал” сэдвээр илтгэл тавьсан нь залуусын талархлыг хүлээсэн юм. Мөн зохион байгуулагчдын зүгээс Дорнодын залуусаа нэгэн зорилгод хөтлөх уриатай болоё гэсэн санал тавьсны дагуу оролцогчид хэд хэдэн хувилбар дэвшүүлснээс "Бидний нэгдэл-Шинэ Дорнод!” гэсэн уриаг сонгов.

Нийслэл хот дахь Залуучуудын холбооныхон энэхүү арга хэмжээг аливаа улс төр, нам хүчний ашиг сонирхлоос ангид, зөвхөн нутгийн залуусаа хооронд нь танилцаж, нөхөрлөх боломж олгохоор зорьж зохион байгуулсан. Тийм ч учраас хэн нэгэн улс төрч, сонгуульд нэр дэвшихээр зэхэж буй хүмүүсийг зориуд уриагүй гэж байлаа. Цаашид энэ уулзалтад нэгдсэн залуус олон нийтийн сүлжээгээр групп үүсгэн холбоо харилцаагаа бататгаж, нутгийнхаа ирээдүйн төлөө санаа бодлоо хуваалцаж байхаар болжээ.